Gjëmoi fusha, gjëmoi mali

Ra rrufeja përmbi dhé

Se ç’u vra Selfo Hekali

Ra dëshmor për Mëmëdhe.

Se ç’u vra nji djal i ri

Fali jetën për Liri

Selfo ti mos ki merak

Se ke shokë që t’marrin hak.

Kërcet pushka nëpër Luar

Sulet trimi vrull e zjarr

Dhe kërkon t’a zërë me duar

Isa Toskën tradhëtar.

Shpirt-katran e zemër-lik

I Atdheut një armik.

Selfo ti mos ki merak

Se ke shokë që t’marrin hak.

Këndon Zana trimërinë

E djaloshit trim me fletë

Që luftoi për Shqipërinë

Ai vetë kundër dhjetë.

Lumja ti moj Shqipëri

Për këta Heroj të ri.

Selfo ti mos ki merak

Se ke shokë që t’marrin hak.

Shpirti Selfos do Lirinë

Do Atdhenë të çliruar

Të nderuar Shqipërinë

Tradhëtinë të dërmuar

Selfo ti mos ki merak

Se ke shokë që t’marrin hak.